Яагаад заавал онлайн орчинд бизнесээ амьд байлгах нь хэрэгтэй вэ?
Захиалгын хэрэгсэл гэж юу вэ? Энэ нь зочид буудлын бизнесийн өсөлтөнд хэрхэн тусалдаг вэ?
May 10, 2021
Онлайнаар захиалга авах хэрэгтэй гэж үү?
May 28, 2021
Хаа сайгүй ухаалаг гар утасны дэлгэцрүүгээ ширтсэн хүмүүсийн дүр зураглал олонтаа харагдах болсон. Техник технологийн эрин зуунд бид хөл зэрэгцэн амьдарч байна. Бизнесүүдийн хувьд фм радио болон зурагтаар явах реклам сурталчилгаа гэх мэт уламжлалт маркетинг хоцрогдож эхэлсэн. Завгүй амьдралын хэв маягт шилжсэн өнөө үед зурагтын суваг солиод эсвэл сонин сэтгүүл уншаад суух нэгэн ховорджээ. Аль болох нэг дор олон ажлыг зэрэг амжуулах сонирхолтой болсон гэхэд хилстэхгүй. Бизнесүүд аажмаар онлайн хэлбэрт шилжиж эхэлсэн. Нэн ялангуяа цартахалын нөлөөгөөр хүссэн хүсээгүй бүхий л бизнесүүд онлайнд байрших хэрэгцээ шаардлагатай болсон билээ. Ямар нэгэн хэрэгцээ үүсэхэд хамгийн түрүүнд цахимаас хайлт хийх нь хамгийн оновчтой бөгөөд цаг хэмнэх арга зам болжээ. Монголчуудын хувьд интернетийн хэрэглээ хожуу бий болсон ч хурдацтайгаар өсөн нэмэгдэж байгаа. Зочлох үйлчилгээний бизнесүүдийн хувьд өөрсдийн мэдээллийг онлайнд байршуулах зайлшгүй шаардлагатай болсон. Хэрэглэгчид дэлгүүр хэсч байгаа юм шиг зорьж очин зочид буудлуудыг харьцуулж үзэн сонголт хийх нь юу л бол…
Зочлох үйлчилгээний интернет маркетинг гэж юу вэ?
Дижитал медиа нь маркетингийн салшгүй нэг хэсэг болсон тул аялагчдын өдөр тутмын амьдралд нэвт шингэсэн байдаг. Хүмүүс өнөө үед харилцаа холбоогоо зөвхөн ухаалаг гар утас, олон нийтийн мэдээллийн суваг, имэйлээр дамжуулан удирддаг болсон. Онлайн захиалга нь нийт захиалгын бараг 60% -ийг бүрдүүлдэг гэсэн судалгаа бий. Онлайнаар захиалга хийдэг хүмүүсийн тал хувь нь гар утсаараа асуудлаа шийддэг байна. Энэ бол зочдыг татахад дижитал маркетингийн стратеги ашиглахгүй бол эрсдэлд орж болзошгүйг илтгэх асар их тоо юм. Ядаж л танай зочид буудлын талаар хайлт хийхэд мэдээлэл олдоггүй эсвэл бүр сүүлийн үеийн мэдээлэл гарч ирэхгүй байвал зочдын итгэл үнэмшил буурах бөгөөд танайхыг сонгохгүй байх хүчин зүйл ч болж магадгүй юм.
Хүмүүс технологи, аливаа онлайн эх үүсвэрийг хүлээн авах нэг шалтгаан бол тэдний хайж буй зүйлийг тодруулж, хурдасгах явдал юм. Вэбсайт эсвэл интернэтэд сурталчилгаа хийхдээ эдгээр давуу чанарууд танай зочид буудлын анхаарлын төвд байх ёстой. Дижитал медиа дотор олон төрлийн платформууд байдаг тул зочлох үйлчилгээний зах зээлийг сурталчлах чадвар нь илүү их бөгөөд илүү олон хэрэглэгчтэй холбогдох боломжийг олгодог. Зарим аялагчид үзэсгэлэнтэй зургуудад дуртай бол, зарим нь видеог илүүд үздэг, зарим нь бичгээр мэдээлэл авах дуртай байдаг. Дижитал медиа нь танай зочид буудалд үүнийг нэгэн зэрэг бий болгох боломжийг олгодог. Таны өвөрмөц борлуулалтын цэгүүд юу болох, эдгээрийг үзэгчдэд хүргэх хамгийн сайн арга зам юу болох талаар бодоорой.
Зочлох үйлчилгээний салбарт хүчин зүтгэж буй та бүхэндээ техник технологийн хурдтай шинэчлэлт, хүрээлэн буй орчны байнгын өөрчлөлтийн онлайн орон зайд үнэт цаг, мөнгө, хүн хүчээ үр өгөөжтэй хуваарилан ашиг олох, борлуулалтаа өсгөх, зах зээлд хурдтай тэлэхэд тань нэмэр болохуйц зөвлөмжийг бэлтгэн хүргэж байна.
Сошиал маркетинг
Зочид буудлын Фейсбүүк маркетинг
Фейсбүүк хэрэглэгчдийн 52%-д нь фэйсбүүк найзуудынхаа зургуудаас аялах сэдэл төрдөг байна. Судалгааны явцад 55%-д нь төлөвлөсөн аялалтай холбоотой хуудсууд таалагдсан байна.
Фэйсбүүкээр аялагчдад нөлөөлөхөөсөө өмнө та дараах зүйлсийг хийх хэрэгтэй. Төлбөртэй сурталчилгаа хийх замаар үйл явцаа хурдасгаж болох боловч үзэгчдээ аль болох ‘Органик‘- аар өсгөх хэрэгтэй.
Хуудсаа олон дагагчтай болгохын тулд:
Харилцагчид, найзуудаа урих
Вэбсайт болон имэйл дээрээ Facebook-ийн холбоосыг нэмж оруулаарай
Фейсбүүк гэсэн тэмдэг байршуулах/ хүлээн авах ширээн дээр, зочдын өрөөнд фейсбүүк дээр таалагдах товч дарахыг урих, төлбөрийн баримтан доор байршуулах гэх мэт/
Урамшуулал, тэмцээн зохион байгуул
Сайн чанарын контент тогтмол нийтлэх
Бусад нийгмийн сүлжээн дэх хуудсаа сурталчлах
Өөрийн профайл хуудсыг хайж болох мэдээллээр дүүргэ-Профайл хуудсандаа аль болох их мэдээлэл нэмж, холбогдох олон тооны категорыг хуудсандаа нэмээрэй. Энэхүү мэдээлэл нь Facebook-д янз бүрийн аргаар хүмүүст хүргэхэд тусалдаг. Эдгээр нь хайлтын системийн оновчлолд сайн нөлөөтэй тул холбогдох түлхүүр үгсийг хангалттай ашиглаарай.
Үүний дараа та төлбөртэй Facebook зар сурталчилгааны туршилт хийж эхлэх боломжтой. Бага төсвөөс эхэлж, сүүлийн 30 хоногт таны вэбсайтад орсон, мөн нас, хүйс гэх мэт бусад шалгуурыг хангасан хүмүүст чиглэсэн кампанит ажил эхлүүлээрэй.
Instagram дээр зочид буудлаа сурталчлах
Инстаграм бол өнөөгийн дижитал орчинд зочлох үйлчилгээнийхэн ашиглах боломжтой хамгийн үр дүнтэй олон нийтийн мэдээллийн маркетингийн платформуудын нэг юм. Өнөөгийн байдлаар Instagram нэг тэрбум гаруй хэрэглэгчтэй болжээ.
Зочид буудлынхаа инстаграмд зохистой нийтлэлүүдийг бий болгоход туслах хэдэн санааг танд хүргэе!
Зочид буудлын үзүүлэлтүүдээ онцол
Ажилтнууддаа селфи хийх даалгавар өг-Гал тогоонд шинэ цэс бэлтгэж байгаа, ажилтан зочидтой харьцаж байгаа, зочдыг зугаацуулж буй дүрсийг хуваалцаарай
Зочид буудлаасаа цааш гарах хэрэгтэй-Зочид буудлаасаа гадна өөрийн эргэн тойрон, үзэсгэлэнт газруудын контентыг хуваалцах замаар зорих газраа сурталчлах.
Хаштаг ашиглах- Hashtag нь таны контентыг хайлт хийх боломжтой болгоно.
Зочид буудлын видео маркетинг- Зочлох үйлчилгээний зах зээлд оролцогчдын хувьд хэрэглэгч татах стратеги боловсруулахдаа үүнийг нэн тэргүүний зорилт гэж үзэх хэрэгтэй. Хүмүүс сонссон зүйлийнхээ 20% -ийг, харсан зүйлийнхээ 30% -ийг санадаг, харин сонсож харсан зүйлийнхээ 70% -ийг санадаг гэдгийг бодолцоорой. Та вэбсайтдаа видео нэмж оруулснаар Google-ийн хайлтын үр дүнгийн эхний хуудсанд таны сайт гарах магадлал 53 удаагаар нэмэгддэг.
Зочид буудлын Мобайл маркетинг
Бүх зүйл зочид буудлын мобайл вэбсайтаас эхлэх хэрэгтэй. Өрөө захиалж амжаагүй байх үед зочдод хүргэх туршлага маш чухал бөгөөд зочид буудлын вэбсайт жижиг төхөөрөмжид хэрхэн хариу үйлдэл үзүүлэх нь мобайл сурталчилгааны амжилтын түлхүүр юм. Гар утасны сайн туршлагыг бий болгохын тулд таны вэбсайтыг хэрэглэгчид мэдээлэл харахын тулд томруулах, гүйлгэх шаардлагагүй байх, фонт нь ойлгомжтой, агуулга товч , дуудлага хийхийн тулд товших гэх мэт зүйлсэд анхаарах хэрэгтэй.
Зочид буудлын SEO
Хайлтын системийн үр дүнгийн эхний хуудсыг авч үзэхэд бүх мэдээллийн 90% -иас дээш хувийг хангадаг тул зочид буудал тань Google дээрээс олдохын тулд ‘хайлтын системийн оновчлолын’ гол бүрэлдэхүүн хэсгүүдийг эрэмбэлэх хэрэгтэй. Google-ийн эхний хуудас нь өрсөлдөөнтэй тулааны талбар бөгөөд танай зочид буудал ирээдүйн зочдын нүдэнд тусахын тулд бүх зүйлийг зөв хийх хэрэгтэй. Үүний тулд:
1. Түлхүүр үгсээ үр ашигтайгаар төлөвлөөрэй
2. ‘Google Миний Бизнес’ аккаунт үүсгэх-Үүнд танай зочид буудлын хаяг, утасны дугаар, Google газрын зургийн гео тэмдэглэгээ, зочид буудлын зураг, зочдын тойм, тав тух зэрэг бусад холбогдох мэдээлэл орно
3. Google зочид буудлын зарыг ашиглах талаар бодож үзээрэй- энэ нь төлбөртэй үйлчилгээ боловч Google газрын зураг дээр анхаарал татах үр дүнтэй арга бөгөөд зочдын захиалгыг нэмэгдүүлдэг.
4. Эрэлт, хайлтын өгөгдлийг хянах- Хэрэглэгчдийн эрэл хайгуул, эрэлтийн чиг хандлагыг ажигласнаар та вэбсайт дээрх агуулгынхаа талаар илүү ухаалаг шийдвэр гаргах боломжтой.
5. Контентыг зайлшгүй шаардлагатай зүйл гэж үзээрэй- Блог хөтлөх нь үүнийг хийх хамгийн сайн арга бөгөөд таны контент үргэлж шинэлэг байх болно
6. Онлайн санал шүүмжийг эрэмбэлэх- Зочид таныг тэдэнд санаа тавьж, үйлчилгээгээ сайжруулж, тэдэнтэй илүү ойр дотно ажиллаж буйг тань харахыг хүсдэг.
Та Google Analytics-ийг ашиглан мэдээлэл цуглуулж сурах нь чухал юм. Танай зочид буудлын аливаа стратеги нь дүн шинжилгээ хийхэд чухал үүрэг гүйцэтгэдэг. Танай зочид буудлыг хэн хайж магадгүй, ямар агуулга нь тэдэнд сонирхолтой байдаг талаар илүү их мэдээлэл олж авснаар та вэбсайтынхаа бүх хэсгийг оновчтой болгох боломжтой.
Зочид буудлын Имэйл маркетинг
Өнөө үед онлайн бизнесийн орчинд өрсөлдөөн нэмэгдсээр байгаа нь зочид буудлын операторуудад илүү олон төрлийн маркетинг, түгээлтийн стратеги хийх шаардлага тулгарчээ. Энэ нь зочинтой харилцах, шууд захиалгыг нэмэгдүүлэх хамгийн ашигтай, хэмнэлттэй аргуудын нэг. Имэйл маркетинг нь зочид буудлын салбарт маш чухал үүрэг гүйцэтгэдэг: Зарцуулсан 1 доллар тутамд 38 доллар болгон эргүүлж өгөх бөгөөд хөрөнгө оруулалтын өгөөжийн (ROI) хамгийн сайн суваг юм.
Одоо та зочид буудлынхаа борлуулалтыг нэмэгдүүлэхийн тулд онлайн байх ёстойг үгүйсгэхгүй байх. Зочид буудлаа захиалах, зочид буудалд тань зочлох өч төчнөөн боломжийг олгохын тулд та ядаж Facebook, Instagram-аа хамгийн сүүлд хэзээ идэвхитэй хөтөлснөө шалгаарай.
Эх сурвалж: https://www.siteminder.com/r/hotel-marketing-this-year/
